ТЖМ авиациялық паркі жаңа МИ-8АМТ тікұшағымен толықтырылды
12.12.2020
Алматы қаласында АҚ «№ 405 Авиажөндеу зауыты» аумағында 12 желтоқсанда Қазақстанда құрастырылған алғашқы Ми-8АМТ тікұшағының тұсаукесері Қазақстан Республикасының төтенше жағдайлар бірінші вице-министрі Күлшімбаев Ибрагим Дәукесұлы, Қазақстан Республикасының индустрия және инфрақұрылымдық даму вице-министрі Жанжуменов Талғат Жеңісұлы, «Қазақстан инжиниринг» ҰК» АҚ басқарма орынбасары Керейбаева Мұхтар Жұмағазинұлы, АҚ «№ 405 Авиажөндеу зауыты» Ушаков Константин Валерьевич, «Ресей тікұшақтары» АҚ бас директорының бірінші орынбасары Фомин Сергей Валерьевич және «Азаматтық авиация академиясы» АҚ ректоры Сейдахметов Бекен Канелович қатысуымен өтті.
Ұлан-Удэ авиациялық зауытында жасалған машина жиынтықтарын жеткізу Қазақстан Республикасының Тұңғыш Президенті Нұрсұлтан Назарбаев пен Ресей Федерациясының Президенті Владимир Путин арасында бұрын қол жеткізілген уағдаластыққа сәйкес Үкіметтің белсенді қолдауымен жүзеге асырылды.
2019 жылы қол қойылған «Қазақстан инжиниринг» ҰК» АҚ, «№ 405 авиажөндеу зауыты» АҚ және «Ресей тікұшақтары» АҚ арасындағы үшжақты келісімді табысты іске асыру ағымдағы жылы республикалық тікұшақтар паркін, оның ішінде жаңадан құрылған төтенше ведомствоның мұқтаждары үшін толықтыруға мүмкіндік берді.
Техниканы құрастыру және оларды ТЖМ талаптарына бейімдеу № 405 авиажөндеу зауытында жүзеге асырылды, ол Орталық Азия өңірінде осы үлгідегі тікұшақтардың өмірлік циклын жөндеу және сүйемелдеу мәселелерінде үлкен құзыретке ие. Зауыт Ми-8/17/171 тікұшақтарын жөндеу, жаңғырту және техникалық қызмет көрсету үшін қазақстандық және халықаралық органдармен сертификатталған.
Тікұшақ ТЖМ орындайтын міндеттерді есепке ала отырып қалыптастырылды және жолаушылар мен жүктерді тасымалдау, табиғи апаттар мен табиғи катаклизмдер аймақтарындағы авариялық-құтқару жұмыстары, ормандарды қорғау, өрт сөндіру, сондай-ақ ел халқына санитариялық авиация қызметтерін көрсету үшін бейімделді.
Техника авиациялық қызметтер мен жұмыстардың кең спектрін орындауға арналған қазіргі заманғы жабдықтармен, ұшудың практикалық ауқымын 2 есе ұлғайтатын қосымша отын бактарымен жабдықталған.
Авиациялық техниканы тиімді басқару үшін ТЖМ авиациялық бөлімшесінің ұшу және техникалық құрамы теориялық және практикалық қайта даярлаудан өту үшін «Ұлан-Удэ авиациялық зауытына» жіберілді.
Пайдаланудың қарапайымдылығы, сенімділігі, қызмет көрсетудегі қарапайымдығы және жүк көтергіштігі мен ұшу биіктігі бойынша бірегей мүмкіндіктері бар Ми-8АМТ тікұшақтарын аралас климат пен тау бедері тән Қазақстанда пайдалану ең тиімді шешімдердің бірі етеді.
Елбасының көреген саясаты арқасында Қазақстан өз тарихында алғаш рет ауыр тікұшақтарды өнеркәсіптік құрастыру мен сервистік өндіруді жүзеге асыратын мемлекетке айналды
